2025. EDIZIOA
Gurutzatuko ditugu zubi horiek guztiak?
Dantzaldiak, Bilbo-Bizkaiko Nazioarteko Dantza Jaialdiak, mende laurdena gainditu du eta XXVI. edizioari hasiera emango dio. 2000. urteaz geroztik udazkenero bezala, jaialdiak dantza garaikideari pultsua hartuko dio iraila eta abendua bitartean, gure lurraldeko hainbat agertokitan.
Anne Teresa De Keersmaeker dantzari eta koreografo belgikar itzaltsuak dioen bezala: Mugimendua, definizioz, “etengabeko aldaketa” da; eta etengabeko aldaketa txiki, lasai baina esanguratsuen bidez, Dantzaldia 2025 dantzaren panoraman erreferente bihurtuta iristen da, ez bakarrik gure lurraldean, baizik eta, jakina, estatu mailan eta baita nazioartean ere.
Dantzaldiak pixkanaka-pixkanaka aldatu du gizartearen begirada dantza garaikideari buruz, bideak irekiz eta eskuragarri eta hurbilago eginez gure lurraldearen benetako bihotzera: jendearengana. Dantzaldia aldatu egin da, urtez urte, agertoki berriak gehituz, Bilboko eta Bizkaiko espazio ugariren konplizitateari esker; XXVI. edizio honetan bi egoitza berri ditugu: BilbaoArte eta Multicines 7. Dantzaldia, organikoki, aldatu egin da aurten, orain arte gidatu dutenek lekukoa talde berri bati eman baitiote. Talde berri horrek bidaia hau erantzukizunez, esker onez eta bokazioz jarraitzeko eta zabaltzen jarraitzeko erronka hartu dugu.
Azken aldaketa hori bereziki pribilegiatua izan da; izan ere, belaunaldien arteko erreleboa bi taldeen artean eskuz esku egin da hainbat hilabetetan, elkarrekin lan eginez eta grina partekatuz. Eta lankidetza natural hori izan da orain eraiki dugun Dantzaldia 2025 hau argiztatzeko aukera ematen duena, elkarrekin, sartzen diren pertsonekin eta irteten direnekin batera.
Azken hauei, Laura Etxebarria eta Luque Tagua, eskertu nahi dizkiegu bi hamarkada eta erdiko lana (lau hamarkada, egia esan, jaialdi honen sustatzaile den La Fundición aretoaren ibilbidea kontuan hartzen badugu) konpromisoagatik, ikuspegi aitzindariagatik, ausardiagatik eta dedikazioagatik, Dantzaldiari bizitzako lehen laurden honetan forma eman diotelako. Orain iristen garenoi, gorputzen, ideien eta publikoen arteko elkarrizketa bultzatzen jarraitzeko nahiak eragiten digu, lehiaketa honen pultsuari eutsiz, bizirik eta etortzeko dagoenari irekita.
De Keersmaeker-en ikuspegia berreskuratuz: errelebo honetan ez dago hausturarik, baizik eta aldaketa txikien segida bat, eta, beraz, mugimendua; jarraitutasun-mugimendu bat, beste ñabardura batzuekin, galdera berriekin eta azentu desberdinekin. Horrela, Dantzaldiak jarraitu, eraldatu, aldatu eta, azken finean, mugitu egiten da. Eta artearen bidez komunitatea eraikitzen jarraitzeko konpromisoa berritzen du, sorkuntza garaikidearen, pentsamendu kritikoaren eta emozio partekatuaren aldeko apustua egiten jarraitzekoa. Dantza -aldaketa bezala- eguneroko bizitzaren parte dela eta gizarte osoaren eskura egon behar duela uste dugulako.
Azkenik, bereziki eskertu nahi dugu erakundeen babesa, proiektuaren garrantzia eta interes publikoa ulertu dutelako, baita gure jarduerak hartzen dituzten egoitza guztien konplizitatea eta hainbat esparrutatik Dantzaldiarekin bat egiten duten erakunde laguntzaileen babesa ere. Eta, jakina, eskerrak eman nahi dizkiogu publikoari 25 urte hauetan emandako erantzunagatik. Espero dugu datozen urte askotan ere oso gogotsua izatea. ESKERRIK ASKO.
Webgune honetan duzue BilboBizkaiko Nazioarteko Dantza XXVI. Jaialdiaren programa, Dantzaldia 2025ekoa. Edizio honek ez du soilik belaunaldien arteko zubi lana egiten lehiaketaren beraren baitan, beste hainbat zubi gehiago ere zabaltzen ditu: dantzaren eta beste diziplina artistiko batzuen artekoa, herrialdeen artekoa (Frantziatik, Italiatik, Greziatik eta Portugaldik iritsitako konpainiekin), iraganeko beste emakume sortzaile batzuei etorkizunera proiektatzeko begiratzen dieten emakume sortzaileen artekoa… Gurutzatuko ditugu zubi horiek guztiak?
Dantzaldia 2025: Aurkezpen-bideoa
